BACOLOD CITY-Masobra tunga ka milyon ka pesos nga balor sang suspected shabu ang narekober sa buybust operation sa Sitio Sibucao, Brgy. Banago ciudad sang Bacolod kagab-i.
Sa operasyon sang Regional Intellligence Division (RID) sa pagpamuno ni Police Lieutenant Adrian James Albaytar kag Bacolod City Police Office (BCPO), apat ka mga indibidwal ang naaresto kalakip ang subject nga babaye kag utod sini kag duha pa ka mga lalaki.
Ginkilala ang subject nga si Erica Lim kag upod sini nga naaresto ang iya utod sa amay nga si Christine Lim, Renny Escobar kag Hengie Ricarder.
Nakuha sa paghinakop sang mga suspetsado ang isa ka elongated plastic sachet sang suspected shabu kabaylo sang P1,000 nga buybust money.
Dugang nga narekober sa posesyon sang mga ini ang lima pa ka elongated, 4 ka heat-sealed transparent kag 3 pa gid ka sachets sang suspected shabu, digital weighing scale, coin purse kag duha ka 38 caliber revolver kag isa ka 9mm nga armas luthang.
Suno kay Police Lt. Colonel Leonardo Borromeo sang BCPO, kapin sa P600,000 ang balor sang suspected drugs nga narekober sa buybust.
Suno diri, high value target ang mga naaresto.
Samtang nakilal-an si Ricarder nga siya man ang nagluthang kay Albaytar sa mga nakaligad nila nga operasyon sa lugar.
