Ginabanta nga marelease na sa masunod nga semana ang social pension sang mga senior citizens nga ginapaagi sa Department of Social Welfare and Development.
Kaina sang aga nagpadulong sa Bombo Radyo ang 93-anyos nga si Federicko Bawaan sang Brgy. Singcang Airport, siyudad sang Bacolod agud ipamangkot ang status sang ila social pension.
Suno kay Bawaan, wala sila nakabaton sang social pension nga P500 halin sang bulan sang Enero.
Bangud sa kakulang sang kwarta, duha na ini ka adlaw nga wala sang bugas kag ginahatagan lang sang ila tupad balay.
Aminado ang senior citizen nga wala siya ginasakdag sang iya mga kabataan.
Bangud sini, nagalaom si Bawaan nga marelease na ang ila social pension.
Sa pagpakig-angot sang Bombo Radyo kay Department of Social Services and Development Head Pacita Tero, sa masunod nga semana ang tentative nga releasing sang social pension.
Suno kay Tero, P6000 ang igarelease bangud tingub ang isa ka tuig nga social pension.
Sa siyudad sang Bacolod, may yara sang 2400 ka mga social pensioners apang may yara sang 26 nga subject for validation.
Ginkompirmar man sini nga nalakip si Bawaan sa mga mahatagan sang social pension bangud yara ini sa validated nga listahan.
