Hustisya ang ginapanawagan sang subang nga anak sang mag-asawa kag utod sang duha ka menor de edad nga ginmassacre kagab-i sa Sitio Kangkiling, Barangay Buenavista, Himamaylan City, Negros Occidental.
Sa interview sang Bombo Radyo Bacolod kay Emily Germino, wala sang kontra ang ila pamilya kag sila ang nagapuyo sa nasambit nga lugar humalin pa sang tuig 2011.
Suno kay Germino, kasubo kag wala pa ini sang nahibaluan kun sin-o ang nagapatay sa mga ginikanan sini kag sa iya nga duha ka mga utod.
Suno diri, wala sang kontra ang ila mga ginikanan bisan sa una nila nga gin-estaran sa Sitio Sibucao, Barangay Buenavista sa nasambit nga ciudad kag nagsaylo sa Sitio Kangkiling kun sa diin nagluntad ang massacre matapos nga makapamana ini sa nasambit nga lugar.
Suno diri, wala man siya sang nahibaluan nga motibo sang pagpatay sa iya mga ginikanan kag duha ka utod.
Wala man direkta nga nagasuporta ang pamilya sa makawala nga grupo apang nagahatag ang mga ini sa tion nga may magpangayo sa ila.
Panawagan sini nga mahatagan sang hustisya ang brutal nga kamatayon sang iya ginikanan kag duha ka utod.
