Ginkumpirmar sang mga kasilingan sang 7-anyos nga si Janelle Mae Didal alyas Bebe nga gilayon nangindulaan sa ila lugar sa Villa Miranda, Barangay 6A, Victorias City ang ginatudlo sang pamilya nga suspetsado samtang ginapangita ang biktima kagab-i.
Suno sa isa sa mga nagpangita kay Bebe nga si John Evert, nakit-an pa nila si Mark Besa ginabanta alas-5:30 kahapon sang hapon kun sa diin nagsugod ang mga himata kag residente sa pagpangita sa Grade 2 pupil.
Apang suno kay John Evert, nakailis na si Besa kag gilayon ini nga naglakat kag wala na nakabalik.
Suno naman kay Punong Barangay Ana Mae Claro, wala pa sang konktreto nga ebidensya nga si Besa ang may kahimuan sa krimen.
Base sa rekord nga uyat sang barangay suno kay Claro, drug surrenderer si Besa.
Sang tinalikdan nga bulan, napriso man ini bangud sa domestic violence apang wala gindayon sang iya misis ang pagpasaka sang kaso.
May mga nagareklamo man suno sa barangay official nga nagapangawat si Besa apang wala sang formal complaint sa barangay.
Nagakooperar man ang misis sang suspetsado apang wala ini nakahibalo kun sa diin nagpadulong ang iya mister bangud wala siya sa ila balay sang ini ang nagbiya kagab-i.
