Gin-ako sang suspetsado nga si Mark Besa nga high ukon bangag ini sa iligal nga druga sang ginhimuslan kag ginpatay niya ang pito ka tuig nga si Janelle Mae Didal sa Villa Miranda, Barangay 6A, Victorias City sadtong Domingo sang hapon.
Sa interview sang Bombo Radyo Bacolod kay Police Captain Joy Ellaga, deputy chief sang Victorias City Police Station, gin-ako ni Besa nga ginsugo niya si Didal nga magbakal sang sigarilyo, ginabanta ala-1:00 sang hapon.
Sang nagbalik na ang bata sa ila balay agud iduhol ang sinsilyo, gindala ini ni Besa sa banyo kag ginmolestiyahan.
Ginpanginwala ni Besa suno kay Ellaga nga may penetration nga natabo kundi ginhampangan lamang sini ang kinatawo sang biktima.
Apang santo sa autopsy examination sa bangkay ni Didal suno kay Ellaga, may yara sang laceration sa hymen sini nga patimaan nga ini ang ginhimuslan.
Bangud high sa iligal nga druga si Besa, ginapahayag nga ginbunggo niya sa matig-a nga bagay ang ulo ni Didal tubtub napatay apang wala na sini gindetalye kun paano niya gintago sa basurahan ang bangkay.
Bangud may ginlubong sa lugar, nagkumpanyar man si Besa agud taguon ang iya ginhimo.
Pagkatapos sang lubong, nagpanago si Besa sa Barangay 9 apang sang kaagahon, nagbalik ini sa Villa Miranda kag nagpangawat sang pumpboat nga iya ginsakyan patabok sa Barotac Viejo, Iloilo.
