Kabug-usan nga 20 ka mga persona ang ginpadangat sa ospital matapos mabungguan sang pribado nga salakyan ang Ceres bus sa Purok Kapahuan 2, Barangay Sampinit, Bago City, Negros Occidental kaina sang aga.
Suno kay Police Captain Leonel Adolacion, deputy chief for operations sang Bago City Police Station, naglupok ang goma sang Montero Sport nga padulong sa sur nga direksyon gani gin-agaw sini ang lane sang Ceres bus nga nagikan sa Kabankalan kag padulong sa Bacolod.
Naglikaw pa kuntani ang bus nga ginamaneho ni Rolando Sundia apang nalab-ot gihapon ini sang SUV kag nahulog sa kanal.
Nakakas man ang pangulihi nga royda sang bus bangud sa impact sang pagkabunggo.
Nagikan sa 25 ka mga pasahero sang bus, 19 diri ang gindala sa Bago City Hospital matapos mag-angkon sang menor nga kapilasan kag palaminhod sang lawas, apang sa karon yara na sila sa luwas nga kahimtangan.
Samtang pilason naman ang driver sang SUV nga Ramil Erellanan sang San Mateo Village, Barangay Banago, Bacolod City kasunod sang aksidente kag nagbalibad nga maghatag sang pahayag.
Suno kay Adolacion, indi nila matumod kun nakainom sang makahulubog nga ilimnon si Erellanan.
