May inisyal na nga settlement sa tunga sang tag-iya sang 10-wheeler truck kag sang call center agent nga aksidente nga nalapakan kag natunga ang lawas sa Arabay 1, Burgos Extension, Brgy. Estefania, Bacolod City.
Madumduman nga napatay ang isa ka babayi nga call center agent matapos nga matunga ang lawas sang aksidente nga malakapan sang nasambitan nga truck.
Sa interview sang Bombo Radyo Bacolod kay Police Major Ramel Sarona, pinuno sang Traffic Enforcement Unit ng Bacolod City Police Office, nag-overtake ang motorsiklo nga ginamaneno ni Rexis Gallano sa 10 wheeler truck nga padulong sa ciudad sang Bacolod.
Apang wala ini gilayon nakabalik sa lane gani nabungguan sini ang nasugata nga motosiklo nga dala ni Lloyd Arca.
Bangud sa impact, nagtabog si Jonalyn Lamis sa royda sang truck kag nalapakan ini nga nagresulta sang pagkautod sang lawas nga gintunaan sang kamatayon sini.
Nakaagom man sang pilas ang driver sang mga motorsiklo.
Sa karun may inisyal naman nga settlement ang tag-iya sang truck kasubong man ang driver sa pamilya sang biktima.
