Nakilal-an na ang tag-iya sang salakyan nga nakita nga may mga dugo kag gin-abandonar sa sulod sang kampo sa Sitio So-ol, Brgy. Gargato sa banwa sang Hinigaran.
Ang tag-iya sang salakyan ang nakilala nga si Kristine Joy Dignadice, residente sang Victorias City.
Nahibaluan nga gireport sang isa ka concerned citizen sa Hinigaran Municipal Police Station ang nakita nga grey nga Hyundai Accent nga yara sa sulod sang kampo alas-3:58 kahapon sang hapon.
Sang makita nga may-ara sang mga dugo sa passenger kag drivers seat sang salakyan, gilayon man nga nagpatawag sang Scene of the Crime Operation agud maproseso ang mga ebidensya.
Ginlibot man sang kapulisan ang kakampuhan, apang wala man sang nakita nga bangkay.
Yara lamang sa atubang ang mga dugo, samtang sa likod yara ang mga pagkabutang kaangay sang parilyahan, mga panapton, habonera, ice box kag iban pa.
Gani ginalantaw nga gikan sa outing ang driver.
Sa paglab-ot sa pamilya, ginpahayag sang mga ini nga indi nila macontact ukon unattended ang cellphone number ni Dignadice.
Sa karun wala pagid matumod kun diin si Dignadice kag wala paman sang natumod nga witness.
