Ginpahayag sang regional director sang Office of the Civil Defense – Negros Island Region nga mahimo nga i-evacuate ang tanan nga residente sang Canlaon City, Negros Oriental kun ipasaka na sa Alert Level 4 ang Bulkan Kanlaon.
Suno kay Director Donato Sermeno mahimo nga halos tanan nga mga residente ang magaevacuate bangud sa lokasyon sang ciudad.
Suno kay Sermeno, ang mahimo nga kadtuan naman sang mga evacuees ang banwa sang Vallehermeso bangud ang nasambit nga lugar ang malayo na sa Bulkan Kanlaon.
Samtang sa pihak nga bahin, may yara naman sang window period ang mga residente nga nagapuyo sa 6 kilometer radius extended danger zone sang Bulkan Kanlaon agud nga mabalikan ang ila nga mga sapat kag pananum.
Ini ang umpisa alas 6:00 ang takna sang aga kag tubtob alas 4:00 ang takna sang hapon.
May yara naman ang mga ini sang ginakuha nga passes halin sa camp site agud ipakita sa check point agud nga makalabay.
Pag-abot sang alas 4:00 sang hapon ang tanan ang dapat magpanaog na kag magbalik sa camp site.
Pangabay ni Sermeno nga magpangamuyo nga indi na liwat maglupok ang Bulkan Kanlaon kag matabo ang worst case scenario bangud tanan ang nabudlayan na halin sa evacuees padulong sa mga empleyado sang mga government agencies.
Aminado man ini nga medyo manubo na ang morale sang mga evacuees kag nagapahayag na nga luyag na magpauli sa ila nga puluy-an.
