Ginpahayag sang National Commander sa Task Force Kasanag nga mahimo mangatubang sang problema si Hinigaran Mayor Jose Nadie Arceo sa paghold sini sang business permit nga aprubado na kuntani.
Madumduman nga una nagdangop sa Bombo Radyo Bacolod si Lucita Libria, sang Purok 4, Barangay Gargato, Hinigaran, Negros Occidental bangod sa gina-alegar paghold sang alkalde sa business permit apisar nga nakompleto na sini ang tanan nga requirements para sa ugahan.
Sa interview sang Bombo Radyo Bacolod kay John Chiong, gin-athag sini nga ang pagproseso sang business permit ang nagahalin sa Barangay, nagalabay sa mga ahensya kaangay sang Municipal Health Office para sa sanitary permit kag iban pa.
Kun mapasar sa tanan nga requirement, wala sang makita nga rasun kun ngaa ihold sang alkalde ang permit sang natungdan.
Ini ang magapakita sang grave abuse of authority, nga mahimo pangatubangon sang alkalde kun indi sini irelease ang business permit.
Nahibaluan nga sang mag-inquire ang tagreklamo, sabat lamang sang alkalde nga pamangkuton pa sini kun ano ang desisyon sang nagareklamo nga kaingod.
Apang wala man sang valid claims ang nagareklamo nga beach resort bangod gina-alegar sini nga mabaho apisar wala pa nakasugod sa operasyon ang ugahan.
Isa pa sa ginapahayag nga rasun amo ang pagdeklarar nga eco-tourism zone sa area, apang sa palibot sini madamo man sang existing na nga ugahan nga padayun man sa pag-operar.
Ginapahayag nga maghimata ang asawa sang tagreklamo nga si Arsenio Pagunsan kag si Mayor Arceo.
Pasalig ni Chiong nga bukas ang ila talatapan sa tanan nga gina-agrabyado kag sila ang wala nagapili sang ginabuligan.
Dugang pa sini nga bisan si Mayor Arceo ang nakahingyo naman sang bulig sadto sang ini ang nagkaproblema sa chief of police sang ila banwa.
