Naga-ugyon ang Task Force Kasanag sa pagpa-uyat sa Office of the Ombudsman sa imbestigasyon sang flood control corruption, apang dapat indi magpa-impluwensya sa politika ang nasambit nga ahensya.
Sa interview sang Bombo Radyo Bacolod kay Task Force Kasanag National Commander John Chiong, indi sila makahatag sang 100 porsyento nga pagsalig kasunod sang recantation sang apat sa 18 ka ex-bodyguards kag bagmen ni ex-Representative Zaldy Co.
Para sa ila, makaduluda ang gulpyada nga pagbaliskad sang apat.
Apisar nga may 14 pa nga nabilin, aminado si Chiong nga maapektuhan naman ang statement sang mga ini.
Kumpormi naman ini nga indi na ipadayun sang Senate Blue Ribbon Committee ang imbestigasyon bangod pipila lamang ang mahimo wala sang kaangtanan.
Sa pihak sini, pangabay nila sa Office of the Ombudsman nga manindugan kag indi magpadala sa mga mando sang yara sa gahom.
Suno diri, dapat tuod-tuoron ang away, kag mapasabat ang may salabton.
Gindumdom sini nga ginpahayag sadto ni Senator Panfilo “Ping” Lacson nga 69 ka mga Kongresista ang involved sa flood control corruption, apang wala man lang sang naaresto.
Nagpahayag man sadto si Department of Social Welfare and Development Secretary Vince Dizon nga mapuno ang prisuhan sang mga involved, samtang si Ombudsman Jesus Crispin “Boying” Remulla ang nagpasalig naman nga plastado na ang prisuhan sa pag-akumodar sa mga kurap.
Apang para kay Chiong, ini ang kaangay sang tikal lamang bangod pipila lang ang mga gin-aresto bangod sa issue.
Dugang pa sini nga si ex-DPWH Secretary Manuel Bonoan ang plano pa nga himuon nga state witness apisar nga isa sa makabig mastermind sa kurapsyon.
Suno kay Chiong, kinahanglan na sang divine intervention ang ginapangatubang nga national crisis.
Panawagan sini sa mga pumuluyo nga pangamuyuan ang sitwasyon sang Pilipinas, samtang nagapati ini gihapon nga may mga goverment servant pa nga nagapabilin nga matarong kag may pagsalig sa good governance.
Sa imbestigasyon sang Ombudsman, dapat ini ang bukas gihapon sa media agud mangin transparent sa publiko ilabi na nga ang issue ang nahanungod sa trillion pesos nga pondo sang gobyerno, nga mangin kautangan sang masunod nga henerasyon.
