Yara na sa estable nga kondisyon ang tatlo ka bulan nga lapsag nga babayi nga nahulog sa nagcollapse nga Camugao Suspension Bridge sa ciudad sang Kabankalan kadungan sang fluvial parade sa Sinulog Festival.
Madumduman nga nabugto ang kable sang taytay kag nagtakilid ini samtang naga-fluvial parade pasado alas 7:00 kahapon sang aga.
Bangud diri, nahulog ang mga tawo nga nagalatay sa taytay kalakip na diri ang tatlo ka bulan nga lapsag nga babayi.
Suno sa Kabankalan City Risk Reduction and Management Office, isa ka DRRM volunteer responder ang personal nga nagretrieve sang lapsag kag ginhatag ini sa isa ka barangay official nga gilayon naman nga ginpasa sa mga sa mga local swimmers pakadto sa higad sang baybay sa Brgy 6 bangud ang mga rescue boats sang DRRM ang nagalibot pa sang lugar sang insidente.
Sang nahibaluan sang mga DRRM responder nga yara na sa higad sang baybay ang lapsag, gilayon sila nga nagtawag sang hospital transpo nga nagpatigayon sang artificial resuscitation kag narevive ang lapsag.
Nakaconfine sa karon sa ICU ang biktima kag gindeklarar nga yara na sa estable nga kondisyon.
Ginpahayag naman sang isa ka Bacolodnon nga nagkadto sa Kabankalan agud magsaulog sang Sinulog nga alerto ang mga rescue personnel sang Kabankalan sang natabo ang insidente.
Sa interview sang Bombo Radyo kay Ruby Parolanan, ginpahayag sini nga madamo sang mga pumuluyo ang nahulog sang narumpag ang Camugao Bridge samtang ang iban naman ang nakakabit.
Suno kay Parolanan, gilayon naman nga nagresponde ang mga rescuers kag insigida nga nahatagan sang first aid ang mga pumuluyo nga nahalitan.
Gindugang man sini nga naghatag man sang assistance ang ciudad.
Wala man sini gin-ekspektar ang natabo bangud suno sa iya, nagtambong ini kuntani agud magsinadya.
