Ginsulod kag ginhold-up ang tatlo ka mga construction worker sa ginakay-o nga gasoline station sa Purok San Jose 2, Barangay Sum-ag, Bacolod City alas-2:45 kaina sang kaagahon.
Sa interview sang Bombo Radyo Bacolod sa foreman nga si Adulfo Jurado, nagbugtaw ini agud mag-init sang tubig para magpangape sang nag-abot ang itom nga Innova.
Nagpinsar ini nga boss nila ang nag-abot bangod masami man ini nga nagahapit sa site agud magdul-ong sang pagkaon.
Apang sang lapit na nasambit nga salakyan, mga bataon nga mga lalaki nga sa pagbanta sini wala pa 30 anyos ang edad, ang nagpanaog kag ang mga ini ang lunsay may tabon nga bayo sa nawong gani mata na lamang ang makita.
Tatlo sa mga ini ang nanaog sa salakyan, samtang nagpabilin naman ang driver.
Gilayon sang mga lalaki nga ginpangita sa iya ang cellphone kag wallet kag ini ang gintayaan pa sang armas-luthang.
Ginsugo naman sang armado ang duha sini ka upod nga sudlon ang barracks, kun sa diin yara ang duha pa ka construction worker.
Suno kay Jurado, nakabati ini sang linagapok bangod mahimo nagbato ang iya upod kag gintindakan ang mga upod sang gina-alegar hold-uper.
Nakuha sa ila ang duha ka cellphone kag ang wallet sang upod nila nga kalaslon kuntani, gani nataban ang iya napain nga kwarta.
Wala naman nakuha ang wallet ni Jurado bangod ini ang nakatago sa iya hiligdaan, gani sang siya ang ginpamangkot sang mga armado, gintudlo na lamang sini ang mga construction materials.
Ini ang dal-on pa kuntani sang mga hold-upper, apang ginpaandaman ang mga ini ni Jurado nga sila ang magadugay pa kun pangbitbiton ang mga kagamitan.
Suno diri, naglakat na kuntani ang Innova apang bangod sa kaakig sang upod sini nga nasipaan, ginbato sini sang martilyo ang salakyan.
Gilayon naman nga nag-atras kag nagwa ang mga armado kag ginpalukpan ang iya nga kaupod, nga nag-igo sa pader, samtang siya ang gintayaan man gani ini ang nagapakitluoy na lamang.
Kasunod sini, nagbiya man gilayon sa lugar ang mga suspek, apang ginseguro naman ni Jurado nga matandaan ang plate number sang itom nga Innova nga FAI7581.
Sa pinsar sini, nga kun siya ang mabuhi, dapat nga mapaandaman sini ang iban batok sa mga hold-upper.
