Ginkumpirmar sang alkalde sang San Carlos City, Negros Occidental nga wala naga-eksister ukon wala sang rekord ang tatlo ka mga flood control projects nga gintumod sang Department of Public Works and Highways (DPWH) Central Office nga yara sa ciudad.
Sa interview kay Mayor Renato Gustilo, nakabaton ini sang sulat nagikan sa DPWH national office nga ginapakumpirmar kun may yara gid man sang tatlo ka mga flood control projects nga gintukod sa ciudad kasubong man ang ginpadala nga acceptance letter nga may pirma sini kag sang personnel sang City Engineers Office sang San Carlos City.
Ang sulat ang nabaton ni Gustilo antes ang 4th State of the Nation Address (SONA) ni President Ferdinand “Bongbong” Marcos Jr.
Suno sa alkalde ang nasambit nga mga proyekto ang wala nagaeksister ukon “ghost” flood control projects samtang ang pirma sini sa acceptance letter ang indi iya kag ginapahayag nga ini ang gin-forge lamang.
Bangud sini, ginmanduan niya ang City Legal Office nga magpadala sang sulat kay National Bureau of Investigation Director Jaime B. Santiago agud ini ang maimbestigaran.
Hugot nga ginpanginwala sang alkalde ang nasambit nga mga flood control projects ang wala naga-exister sa San Carlos City matapos ang kumpirmasyon gikan sa DPWH San Carlos City Engineering District.
Ang tatlo ka mga proyekto ang ginalakipan sang isa ka P77.5 million; isa ka P77.3 million kag isa ka P151.5 million.
Lakip diri ang construction sang flood control sa Andoon river nga nagabalor sang P77.5 million sang contractor nga EKC Construction and Aggregates kag santo sa datos ginsugudan ang proyekto sang April 13, 2023, kag natapos sang Disyembre 2023.
Ika-duha ang pag-construct sang flood control sa suba sang Jigalaman sa Barangay Guadalupe nga balor P77.3 million sa idalom sang Jaben General Contracting Engr. Services nga santo sa report ginsuguran sang Abril 12, 2023 kag natapos sang Disyembre 14, 2023.
Samtang ang ika-tatlo ang construction sang flood control amo ang sa Palampas river sa Brgy. 1, San Carlos City nga nagabili sang P151.5 million kag ginpatuman sang APO General Construction.
