Gina-imbestigahan sa karun sang Philippine Coast Guard kun ang tatlo ka mga vessels nga responsable sa oil spill sa Bataan ang yara sa area bangud imbulbado ang mga ini sa smuggling ukon “paihi” kaupod ang iban nga mga barko samtang yara sa baybayon.
Suno kay PCG National Capital Region (NCR)-Central Luzon spokesperson Lieutenant Commander Michael John Encina, ginatumod sang ila investigating team ang matuod-tuod nga rason kun ngaa ang naglubog nga MT Terranova, MTKR Jason Bradley kag MV Mirola ang yara sa baybayon sang Bataan antes nagluntad ang mga insidente.
Sa idalum sang “paihi” system, ang gatong nagikan sa dalagko nga vessel ang ginasaylo sa mas magagmay nga sakayan agud malikawan ang pagbayad sang tax.
Suno kay Encina, wala nila ginadula ang nasambit nga mga reports kag nagakoordinar sa iban nga ahensya agud mabuligan sila sa previous citations sang nasambit nga mga barko.
Sa karun nagapadayon ang imbestigasyon nga ginahimo sang ila team kag kun may yara na sang resulta, ini ang ila igapakita kag iplastar agud mapahibalo kun ano gid ang gintunaan sang oil spill.
Sang Sabado, ginpahayag ni Justice Undersecretary Raul Vasquez nga gina-imbestigahan sang Department of Justice ang posibilidad sang isa ka “conspiracy” nga gintunaan sang maritime disaster sang Bataan.
