Arestado ang tatlo ka mga persona sa ginpatigayon nga entrapment operation sang National Bureau of Investigation-Bacolod upod ang Department of Trade and Industry (DTI) bangud sa pagbaligya sang overpriced nga alcohol sa dalan Lacson-Galo St., ciudad sang Bacolod kahapon sang hapon.
Ginkilala ang mga nadakpan nga sanday Nanette Cabiles, 45-anyos; Crystel Mae Cortez, 27-anyos kag Simmy Celeste, 32-anyos kag lunsay mga residente sang Barangay Tangub.
Sa interview sang Bombo Radyo Bacolod kay Atty. Renoir Baldovino, pinuno sang NBI-Bacolod, nakabaton sila sang reklamo nagikan sa isa ka persona halin sa banwa sang Isabela nga nakabakal sila sang overpriced nga alcohol.
Upod ang DTI, gilayon nga nagpatigayon sang test-buy ang mga otoridad sa isa ka beauty salon sa ciudad sang Bacolod nga nagabaligya sini.
Suno kay Baldovino, nagadangat sa P90 ang bili sang 250 ml nga alcohol nga dapat yara lang ini sa P40.
Natigayon nila nga nakumpiskar ang 104 ka botelya sang tag-250ml, 37 ka galon kag tatlo ka tag-isa ka litro nga alcohol.
Ang mga suspetsado ang pasakaan sang kaso nga paglapas sa Republic Act 7581 ukon Price Act.
Gindala naman sa NOPPO crime laboratory ang mga narekober nga alcohol agud mahibaluan ang alcohol content sini.
Pananglitan nga mapamatud-an nga indi 70% ang alcohol content, may yara pa sang dugang nga kaso nga pangatubangon ang tatlo.
