Nakakuha sang tatlo ka silver medal sa tatlo ka nagkalain-lain nga singing category ang tumandok sang banwa sang La Castellana sa ginpatigayon nga World Championships of Performing Arts (WCOPA) sa Long Beach, California.
Sa interview sang Bombo Radyo kay Analyn Pialan, nga tumandok sang banwa sang La Castellana, sang Hulyo 5, imbes nga magsaka sa stage para sa graduation, ang iya na lamang iloy ang nagbaton sang diploma bangod nga siya ang yara sa California para sa WCOPA.
Suno diri, masubo man para sa iya nga wala nakatambong sa graduation apang dako naman nga oportunidad ang mangin representative sang Pilipinas sa isa ka international competition.
Sa tatlo ka solo category sa Pop, Rock kag Open category, tatlo man ang nakuha nga silver medal ni Pialan.
Sa Pop category, siya gid lamang ang nakakuha sang silver medal bangod nga wala sang may nakasulod sa category sang gold medal.
Aminado ini nga nakabatyag ini sang pangduha-duha bangod nga madamo sang mabakod nga contestant.
Apang, dako ang kalipay sini nga makabaton sang tatlo ka silver medal kag one year scholarship para mag-eskwela sa New York.
Sa karun, plano ni Pialan nga magtudlo sang pagkanta sa mga kabataan.
Samtang, ang Bailes de Luces dance troupe naman gikan sa banwa sang La Castellana, ang nangin grand champion sa Dance Group of the World category.
Sila ang nag-compete sa contemporary dance, folk dance, kag open category.
