Masobra isa ka libo nga tent ang nag-abot sa Negros Occidental nga gindala sa ciudad sang Himamaylan kag banwa sang Pontevedra para sa patindugon nga tent city.
Ini agud nga butangan sang mga evacuees nga magasobra sa mga evacuation centers ingkaso maglala ang sitwasyon sa tion nga liwat maglupok ang Bulkan Kanlaon.
Suno kay sa Office of the Civil Defense – Negros Island Region (OCD-NIR) Regional Director Donato Sermeno, ang tent city ang pagabutangan sang mga evacuees nga indi na makaigo sa mga evacuation centers.
Sa Negros Occidental, ang tent city ang ipahamtang sa banwa sang Pontevedra kag ciudad sang Himamaylan samtang sa Negros Oriental naman amo ang banwa sang Vallehermeso.
Natalana naman nga amat-amaton sa pagpatindog ang mga tents kag mahimo makaigo diri ang anum ka persona.
May yara naman sang inisyal nga naestoryahan ang mga otoridad kun sa diin ang magahatag sang pagkaon sa mga evacuees sa tent city amo ang Department of Social Welfare and Development (DSWD).
Samtang ang ciudad sang Bacolod kag ciudad sang San Carlos ang nagpahayag nga magahatag sang bulig sa mga evacuees sa tion nga maglala ang sitwasyon bangud sa paglupok sang Bulkan Kanlaon.
