May-ara sang excited apang may-ara man sang nahadlok sa ginalauman nga total solar eclipse nga masaksihan sa Oklahoma City, USA sa Abril 8.
Sa interview sang Bombo Radyo Bacolod kay Analou Reyes, Bombo International News Correspondent derekta sa Oklahoma City, USA, nagalapta na sa mga balita kag social media ang nahanungod sa matabo nga total solar eclipse.
Gin-activate naman ang National Security bangod ginalauman nga madamo sang mga turista nga magabisita sa ciudad agud saksihan ang maragtason nga hitabo.
Dugang pa ni Reyes, nga subong pa lamang, gindeklarar na nga wala sang klase sa Abril 8 para sa kahilwayan sang mga kabataan.
Samtang ginpanugyanan naman sang gobyerno ang mga residente nga magbakal na sang mga groceries kag magpreparar sang flashlights.
Apang wala man sang abiso kun magalawig sang inadlaw ukon makadali lamang ang total solar eclipse.
Apisar nga madamo sang excited kag nagbakal na sang eyeglasses agud personal nga makalantaw sang tuman ka tumalagsahon nga hitabo, may-ara man sang mga pumuluyo nga nahadlok.
Suno kay Reyes, nga may mga nagapati nga ang total solar eclipse ang katumanan naman sang rupture ukon katapusan sang kalibutan.
May nabatian man ini nga impormasyon nga may mga rituals man nga patigayunon ang mga native Indians sa lugar.
Suno kay Reyes, nabatian naman sini ang nahanungod sa ginapahayag portal sa Oklahoma City padulong sa iban nga kalibutan, nga ginapatihan sang pila ka pumuluyo nga magabukas lamang sa tion sang total solar eclipse.
Tinguhaan man sini nga padulungan ang lugar sa Abril 8 agud matsekyar ang sitwasyon.
