BACOLOD CITY – Magabutang sang towing zone sa ciudad sang Bacolod sa madason nga sinemana bilang kabahin sang paghawan sang dalan para sa Association of Southeast Asian Nations (ASEAN) meetings sa bulan sang Marso.
Suno kay Bacolod City Administrator Atty. John Orola, ang mga salakyan nga madakpan sa towing zone ang pagaguyuron kag pagadal-on sa malayo nga lugar.
Ginpabutyag ni Orola nga humalin sang ginsuguran ang paghawan sa dalanon para sa ASEAN meeting, may yara sang mga nagkooperar samtang indi malikawan nga may yara man sang padayon nga nagapasaway.
Nalakip sa mga ini ang mga traysikol kag traysikad nga padayon nagasubay sa mayor nga mga dalanon, partikular ang sa Circumferential Road sa Bacolod Government Center padulong sa Bacolod-Silay Airport.
Bangud sini, ila nakasugtan ni Bacolod Traffic Authority Office (BTAO) Head Police Supt. Luisito Acebuche nga pabaskugon pa ang pagpanakop sa pasaway nga mga drayber.
