Ipaidalom liwat sang Bacolod Traffic Authority Office sa seminar ang tanan nga Bacolod Traffic Enforcers agud nga matudluan kun paano magdeal sa mga motorista ilabi na kun may kabudlayan ang mga ini maghambal sa lengwahe nga English.
Sa interview sang Bombo Radyo Bacolod kay Patrick Leonard Lacson, pinuno sang BTAO, kinahanglan nga ipaidalom sa training ang mga traffic enforcers agud nga matudluan sang paagi kun paano magdeal sa mga traffic violators ilabi na kun foreigner.
Kaangay lamang sang insidente nga natabo sang tinalikdan nga adlaw nga may isa ka foreigner nga nagasakay sa motorsiklo nga nakagitgitan ang isa ka babayi nga nagamaneho sang Honda Civic nga salakyan.
Santo sa video nga nakuha, makita nga gintawag sang BTAO traffic enforcer ang foreigner kag nagpalapit sa salakyan sang babayi samtang sakay sa motorsiklo kag may ginhambal ang babayi.
Apang daw kaangay nagpangakig ang foreigner kag ginhampak pa ang salakyan sang babayi nga kaupod ang bata sa front seat samtang ang traffic enforcer ang ginwakli niya pa ini antes nagdrive sa highway.
Suno kay Lacson, nagpangayo na ini sang bulig sa mga kapulisan agud nga matumod kun sin-o ang foreigner bangud luyag sini nga maestorya kag pahibaluon nga indi maayo kag indi puede ang ginhimo sini.
Suno sa BTAO head, indi man mabasol ang mga traffic enforcers kun indi makahibalo mag-english gani mapatigayon sila sang seminar para mahatagan sang ihibalo ang mga ini sa pagdeal sang kaangay nga sitwasyon.
Nagpanawagan man ini sa iban pa nga mga mga motorista nga kun luyag mag-upod sa seminar, mahimo gid sila makig-angot sa BTAO.
