Nagpaandam ang transport group nga Manibela sang asod-asod nga pagpatigayon sang transport strikes humalin subong nga bulan sang Agosto tubtob sa Setyembre bilang pagpakita sang pagkadismaya sa nangin desisyon sang Presidente nga padayunon ang implementasyon sang Public Utility Vehicle Modernization Program apisar sang panawagan sang Senado nga ini ang suspendihon.
Suno kay Piston (Pagkakaisa ng mga Samahan ng Tsuper at Opereytor Nationwide), national president Mody Floranda, ang ila grupo kag iban nga stakeholders lakip na ang labor group Kilusang Mayo Uno, ang luyag makigbahin sa nagapadayon nga transport strike sa Manibela nga magpamatok sa ila ginatawag nga “false” kag “bogus” modernization scheme.
Nagaprotesta ang transport groups sa mataas nga balor sang modern PUVs nga nagadangat sa kapin P2.5 million kada unit kag ang posible nga displacement sang linibo ka mga drivers kag operators nga indi makasarang magcomply.
