Nagpangayo na ngadaan sang pasaylo ang grupo sang unconsolidated traditional jeepneys sa Bacolod City sa natalana nga pagpatigayon sang asod-asod nga transport strike.
Ini kasunod sang pagbasura ni President Ferdinand ‘Bongbong’ Marcos Jr. sa Senate Resolution No. 1096 nga nagapanawagan sang suspension sang Public Utility Vehicle Modernization Program.
Sa interview sang Bombo Radyo Bacolod kay Bacolod Alliance of Commuters, Operators and Drivers (BACOD) President Rudy Catedral, nagapati ini nga wala sang matabo nga dinakpanay sang unconsolidated jeepneys sa Bacolod City.
Suno diri, indi matuod ang panindugan sang mga konsehal sa ciudad nga 70 porsyento na ang nagsulod sa consolidation process bangod ang ila miyembro ang masobra isa ka libo samtang 2,700 lamang ang kabug-usan nga numero sang traditional jeepneys.
Panindugan sini nga sila ang maga-upod sa nationwide transport strike nga ginpanawagan ni MANIBELA Chairman Mar Valbuena sa Miyerkules.
Karun palang, nagapangayo na ini sang pasaylo sa mga commuters nga maapektuhan sa patigayunon nga asod-asod nga untat-byahe.
Panindugan sini nga ang ila kawsa ang indi lamang para sa magagmay nga operators kag drivers kasubong man para sa interes sang commuters.
