Isa ka student leader sang University of the Philippines Diliman Student Council ang nalakip sa 19 nga napatay sa engkwentro sa Toboso, Negros Occidental, santo sa kumpirmasyon sang amo nga konseho kahapon.
Ginkilala ang biktima nga si Alyssa Alano, Education and Research Councilor sang UP Diliman USC, nga ginbawian sang kabuhi sa nagluntad nga insidente sang Abril 19 sa Barangay Salamanca, Toboso.
Sa pahayag sang USC, natabo ang insidente matapos ang gina-alegar nga “indiscriminate shooting” sang 79th Infantry Battalion sang Armed Forces of the Philippines (AFP), nga nagresulta man sa pagbakwit sang ginabanta 168 ka mga pamilya kag 653 ka mga indibidwal.
Gintawag sang student council si Alyssa bilang “innocent civilian”gani sila ang nagapanawagan sang hustisya kag ginakondenar ang pagkapatay sini, nga ila gina-angot sa ginapatihan militarisasyon sa nasambit nga lugar.
Samtang, nauna na nga nagpagwa sang pahayag ang Philippine Army nga may yara sang engkwentro sa tunga sang mga suldado sang 79th Infantry Battalion kag mga gina-alegar katapo sang New People’s Army sa amo nga lugar.
Santo sa report, 19 ka ginapatihan NPA members ang ginbawian sang kabuhi kag isa ka suldado ang pilason apang yara na ini sa maayo nga kondisyon.
Nagpalab-ot man sang pagpakig-unong ang University of the Philippines Office of the Student Regent sa pagtaliwan ni Alano, nga ila ginlaragway bilang ‘lider-estudyante’ sang UP Diliman.
Sa karon, wala pa sang pahayag ang AFP agud iklaruhon ang magkatuhay nga mga report natuhoy sa insidente.
