BACOLOD CITY – Wala pa mag-24 oras ang nakaligad humalin sang ginpanawagan sa Bombo Radyo, gilayon na nga nakita sang kapid nga nagtapos nga may latin honors ang ila amay nga wala pa nila makilala.
Ang kapid nga Jean Redondo (magna cum laude) kag Joy Redondo (cum laude) ang nag-graduate sa kurso nga Bachelor of Science in Office Administration sa Bacolod City College (BCC) sini gid lamang nga Marso bangud sa pagsakripisyo sang ila iloy kag pila ka mga himata.
Sang ma-interview sang Bombo Radyo, ila ini ginkuha nga kahigayunan nga mapanawagan ang ila amay nga nagahingalan kay Juanito Aleman nga nagbulag sa ila iloy antes pa man sila nabun-ag.
Apang las-10:00 kagab-i, nakabaton sang friend request si Jean sa iya nga Facebook account nga gikan sa isa ka Jeanette Aliman nga ginpahayag anak sang ila amay.
Ginpahayag nga naglanog sa ila lugar sa Siquijor nga may kapid nga nagapangita sa ila nga amay matapos mabatian ang report sang Bombo Radyo Bacolod sa Bombo Network News Morning Edition kahapon.
Gilayon man nga ginbaton ni Jean ang friend request kag nagpadala man ini sang friend request sa iya nga amay kag gilayon man siya gin-confirm sini.
Natigayon na nga maistorya ni Jean ang iya amay paagi sa chat kun sa diin ginpahayag ni Papa Juanito nga nga tuman ini ka malipayon nga sa katapusan, natapos na ang iya pagpangita sa iya mga anak apang nagkabalaka ini nga may kaakig nga nagtubo sa ila ni Jean kag Joy.
Apang ginpasiguro sa iya ni Jean nga bisan gamay, wala sila nagdumot nga kapid kag sa baylo, ila ginhandum nga makita ang ila amay.
Sa bahin naman ni Jean, nangin speechless ini bangud indi ini makapati nga mahatagan pa ini sang chansa nga makilala ang iya amay.
Ang maayo nga balita ang ginpalab-ot na ni Jean sa iya kapid nga si Joy nga sadto on-duty sa isa ka callcenter sa ciudad sang Bacolod.
Suno kay Jean, nakahibi si Joy sang iya mahibaluan ang maayo nga balita.
Samtang, daku naman ang pagpasalamat ni Jean sa Bombo Radyo bangud madamo sang nag-share sang Facebook post sa diin ginpakita ang identification card nga may laragway sang ila amay.
