BACOLOD CITY — Wala sang epekto ang martial law nga gindeklarar sa Mindanao sa kadamuon sang supply sang utanon kag iban pa nga high value crops nga gina-import sang Negros Occidental nagikan sa amo nga rehiyon.
Nahibaluan nga bangud indi bastante ang produksyon sang mga taga-Negros sa demand sang mga pumuluyo, ginabakal pa ang mga utanon sa iban nga mga probinsya kaangay sang Baguio kag yara sa Mindanao.
Ini ang kaangay na gid lamang sang repolyo, bombay kag iban pa nga panakot.
Suno kay Atty. Japhet Masculino, officer-in-charge sang Office of the Provincial Agriculturist sang Negros Occidental, yara man lang sa Marawi City ang kinagamo kag wala man sa iban nga probinsya nga ginakuhaan sang supply.
Ang Marawi suno sa iya ang wala man naga-export sang vegetables padulong sa Negros Occidental amo gani nga wala sang epekto ang tuman kahugot nga checkpoints sa paggwa sang mga utanon.
Paathag dugang ni Masculino, may yara sang lugar nga sarang matamnan sa Negros apang kulang ang kalaparon sini sa demand tagsa ka adlaw.
