Gin-umpisahan na sang Pebrero 16 ang validation sang road clearing operations sang local government units kag ini ang matapos sa Marso 2, 2021, santo sa mandu sang Department of Interior ang Local Government (DILG).
Nahibaluan nga original nga deadline para sa second wave sang road clearing operations santo sa direktiba sang President Rodrigo Duterte ang gintalana sang Enero 15 apang gin-extend sa Pebrero 15 agud mahatagan ang LGUs sang ligwa agud mapreparahan ang pag-abot kag pagpanagtag sang COVID-19 vaccines.
Suno sa DILG Undersecretary Bernardo Florece, ang DILG kag Task Force Road Clearing ang maga-adopt sang strategy nga magapanawagan sa local officials nga magpirma sang kasugtanan nga ang mga punong barangay ang mangin responsable sa pagpabilin nga matinlo ang mga dalanon nga ginhawanan sa road clearing.
Magluwas sa DILG, ginlakip man sang task force ang mga tiglawas nagikan Department of Transportation, Land Transportation Franchising and Regulatory Board, Department of Public Works and Highways, Metro Manila Council, kag Philippine National Police.
Sa March 9 ang deadline sang tanan nga DILG regional offices nga magpasa sang ila nga compliance data kag required forms.
Sa ikaapat nga State of the Nation Address sang tinalikdan nga Hulyo 2019, ginmanduan ni Duterte si Interior Secretary Eduardo Año nga suspendihon ang local officials nga indi magpatuman sang clearing operations nga may tinutuyo nga mabuhinan ang gutok sa trapiko sa Metro Manila kasubong man sa probinsya.
Samtang sa syudad sang Bacolod, nangin matawhay na ang mga sidewalks sa isa merkado sang syudad kag sa downtown area.
Sa interview sang Bombo Radyo kay Roger Cayetano, nagatrabaho sa isa ka balaligyaan sa Gatuslao Street, nalipay ini bangud matawhay na ang sidewalk kag tayuyon na ang paggwa sulod sang mga nagabakal sa ila.
