Ano bala ang sarang mo nga mahimo agud liwat makita ang kahagugma nga nadula bangod sa pandemic?
Isa ka Vietnamese nga lalaki ang ginkinahangalan pa nga irescue sang Thai fishing boat matapos nga gintuyo sini nga tabukon ang Andaman Sea gamit lang ang inflatable boat agud nga pangitaon ang asawa.
Sang Marso 23, nakabaton sang report ang Royal Thai Navy gikan sa kapitan sang isa ka fishing trawler natuhoy sa isa ka gamay nga inflatable boat nga ila nakita sa Andaman Sea, kapin 80 kilometros na ang kalayuon gikan sa takas.
Samtang sakay naman diri ang isa ka lalaki nga may dala nga luggage, halos maubos na nga tangke sang tubig kag pila ka instant noodles.
Ang lalaki ang wala naman nagahambal sang Thai ukon English, gani bangod sa kahangawa nga ini ang madisgrasya sa dagat, ang inflatable boat ang ginguyod nalang sang fishing baot pabalik sa takas.
Ginsugata naman sang marines ang fishing boat kag gintestingan nga makasugilanon ang lalaki apang indi nila ini makuhaan sang nagakaigo nga impormasyon.
Tubtob sa nakakuha ang mga ini sang Vietnamese interpreter kag didto na natumod nga ang lalaki nga ginkilala nga si Ho Huang Hung, ang desperado nga makita ang iya nga asawa nga yara sa India.
Nahibaluan nga nadulaan ini sang contact sa iya asawa duha na ka tuig ang nakaligad bangod sa COVID-19 pandemic gani nagalaom ini nga liwat maka-upod ang kahagugma.
Ang 37 anyos nga lalaki ang naglupad gikan sa Ho Chi Minh City (HCMC) sa Vietnam padulong sa Bangkok, Thailand sang Marso 2 sa paglaom nga makakuha sang flight padulong sa Mumbai, India.
Apang, nagkaproblema ini sa pagkuha sang visa gani wala sini madayun ang plano, gani nagbyahe nalang ini padulong sa Pattaya City, Thailand kun sa diin sini nabakal ang blue kag yellow nga inflatable boat kag ginsuguran sini ang paglayag sang Marso 5.
Ginpahayag ni Hung sa Thai authorities nga preparado na ini nga magbugsay padulong sa India, tabok sa Indian Ocean, nga ginabanta 2,000 kilometers ang kalayuon.
Apang makaligad sang 18 ka adlaw sa dagat, ang Vietnamese ang nakabyahe lang sang 80 kilometros gikan sa baybayon sang Thailand.
Ginabanta nga kun mahimo sini ang paglayag kag wala sang matabo sa iya, malab-ot sini ang India sa sulod sang 625 ka adlaw.
Sa ginahuptan sini nga 10 ka putos sang instant noodles kag gamay nga tubig, ginalantaw nga makadugay si Hung sang pila pa ka adlaw apang imposible nga magadugay ini sa sulod sang 20 ka bulan.
Mapalarun naman nga nasapwan ini ilabi na nga nagsulod ang Bagyo Asani sa kadagatan sang Bengal, Thailand.
Apisar sa kapaslawan sa plano nga paglayag, ang determinasyon ni Hung ang naka-impress naman bisan sa mga Thai Navy, nga nagpahayag nga bisan ano pa ka lapad ang dagat, indi ini maka-upang sa matuod nga paghigugma.
Si Hung ang gintanyagan sang temporaryo nga mapuyuan tubtob sa makapangita sang paagi ang otoridad sa Thailand nga mabuligan ini nga liwat makaupod ang asawa.
