BACOLOD CITY — Ginpasalig sang deputy chief of police sang Silay City Police Station nga wala sang presensya sang Abu Sayyaf Group sa ciudad apisar nadakpan diri ang self-confessed nga anay miyembro sang terorista nga grupo kag ang iya bayaw.
Ini ang paathag ni Police Senior Inspector Ramil Robles kasunod sang report nga may 60 ka miyembro sang ASG nga yari diri sa Negros Island Region kag nagapangita sang magasulod sa ila grupo.
Suno kay Robles, alegasyon lamang ni Absner Kudarat alyas Abu Ben Rafi sang Isabela City sa Basilan nga paryente ini sang isa ka miyembro sang terorista nga grupo.
Apang base sa ila intelligence monitoring, negatibo ang presensya sang ASG sa Negros.
Suno pa diri, nakaalerto sila sa karun ilabi na sa mga shoreline bangud sa kahangawa nga magasaylo sa Visayas ang ASG sa Mindanao apang santo sa impormasyon nga ginapadangat sang mga pumuluyo, wala sang armado nga mga tawo nga nakasulod sa rehiyon.
Paathag sang deputy chief of police, si Abu Ben Rafi kag ang iya bayaw nga si Saldy Abelolah ang gindakop sang Police Provincial Manuever Company matapos nga nagpangtaya sang armas sa Hacienda San Diego, Barangay E. Lopez, Silay City kag indi bangud nga nagapang-recruit.
