BACOLOD CITY — Patigayunon na sa Biyernes ang welcome ceremony para sa mga suldado nga miyembro sang 303rd Infantry Brigade sang Philippine Army nga nakig-away sa mga miyembro sang Maute terror group sa Marawi City.
Suno kay Col. Eliezer Losañes, commander sang 303rd Infantry Brigade, nakabalik na ang mga suldado sang Domingo.
Sa adlaw nga Biyernes, patigayunon ang welcome ceremony para sa ila sa Negros Occidental Provincial Capitol antes magbalik ang mga ini sa ila tagsa ka unit.
Ang nasambit nga mga suldado ang mga miyembro sang division reconnaissance company.
Una na nga ginpahayag ni Negros Occidental Governor Alfredo Marañon Jr. nga hatagan sang pasidungog ang mga suldado bangud sang ila pagbulig nga matapos na ang Marawi crisis.
Suno kay Losañes, nakahinambit ang mga suldado nga nabudlayan ang mga ini sa urban warfare bangud indi tanan nga miyembro sang Philippine Army ang anad diri.
Sa pihak sini, enthusiastic naman ang mga suldado kag excited nga makapahuway matapos ang pagsabak sa giyera.
Nahibaluan nga kahapon, pormal na nga gindeklarar sang Department of National Defense nga tapos na ang combat operations sa Marawi City.
