Masobra isa ka oras ang pagrescue sa drayber sang ten-wheeler truck nga may karga nga masobra 50 ka sako sang bugas nga nakabunggo sa isa ka establishemento sa Bata Flyover, Barangay Banago, ciudad sang Bacolod kaina sang udto.
Ang drayber sang truck ang ginkilala nga si Jonathan Pineda.
Nagluntad ang aksidente pasado alas- 11:00 sang udto matapos nga makabunggo ang truck nga sakay lamang ang drayber.
Nagsulod ang ulo sang truck sa establishemento nga nagapabudlay sa pagpatigayon sang pag-rescue kay Pineda.
Sa interview sang Bombo Radyo kay Krsitine Apelinga, tag-iya sang auto glass store, nagapungko ini sa sulod sang store sang hinali lang nga nagkaladagdag kag nagkalabuka ang ila baligya.
Nakabati ini sang tingog nga nagapangayo sang bulig kag paggwa sini nakita ni Apelinga nga nabunggo ang truck sa establishemento sa tupad sang ila store.
Gilayon man sila nga nangayo sang bulig sa Highway Patrol Group kag amo na nga nagtawag sang rescuers.
Nagdangat sa masobra isa ka oras ang pagkuha kay Pineda kag ini ang wala untat nga ginatughungan sang oxygen.
Natigayon nga makuha si Pineda nga gilayon nga gindala sa ospital agud mahatagan sang nagakaigo nga pagbulong.
