11 ka mga daan nga units sang Ceres Bus ang nasunog sa 1 Communities South Hill, Brgy. Cabug, Bacolod City kahapon sang hapon.
Sa interview sang Bombo Radyo Bacolod kay Ariel Mendoza ang security guard sa 1 Communities South Hill, ginlupad sang hangin ang sin kag naigo ang main wire sang kuryente nga ginhalinan sang kalayo nga nagtuga sang sunog.
Suno kay Mendoza, 15 tanan ang bus units sa lugar apang masobra sa napulo ang nasunog.
Ang daan nga bus units ang gintakdan sang kuryente sang electrician bangud ginahimo na ini nga barracks sang mga construction workers nga nagaubra sa mga balay didto.
Samtang sa report sang Bacolod City Fire Station, 11 ang nasunog kun sa diin siyam ka bus units ang totally burned samtang duha naman ang partially burned.
Ang storage ang ginapanag-iyahan ni Charles Anthony Dumancas.
May isa nga injured matapos naigo sang nagabaga nga metal.
Samtang nagdangat sa P20,000 ang balor sang kahalitan sang nagluntad nga sunog.
