Kun bata ka tuman sa imo ka curious kag ang halos tanan nga yara sa palibot gusto mo testingan kag ang iban gani kung ano-ano nalang ang ginasulod sa baba.
Kaangay lamang sa isa ka 13 anyos nga lalaki sa New Zealand nga gin-operahan sa tinae matapos makatulon sang halos 100 ka magnets nga nabakal sini sa isa ka online shopping app.
Santo sa report nagpadulong sa Tauranga Hospital sa North Island ang wala na ginhingadlan nga solterito matapos magsakit ang tiyan.
Suno sa doctor, aminado ang bata nga lalaki nga nagtulon ini sang 80 tubtob 100 ka 5x2mm high-power (neodymium) magnets isa ka semana na ang nagligad.
Sa X-ray nakita nga nagatapik ang mga magnet kag nagporma sang apat ka tadlong nga linya sa sulod sang tinae sang bata.
Bangud sini, gilayon nga gin-operahan ang 13 anyos kag pagkatapos sang walo ka adlaw nga pagtinir sa ospital, na-discharge ini.
Nahibaluan nga gin-ban ang magnets sa New Zealand halin sang Enero 2013.
Nagpasalig naman ang shopping app nga ginatun-an na nila ang kaso kag kun paano nakabakal ang lalaki sang gintulon sini nga magnets.
