Gin-ako sang stepfather sang 14 anyos nga dalagita sa Sagay City, Negros Occidental nga nakit-an nga nagabitay sa puno sang kahoy nga siya ang nagpatay sa biktima kag wala ini nagsuicide.
Sa interview sang Bombo Radyo Bacolod kay Police Lt. Christopher John Nalangan, deputy chief sang Sagay City Police Station, may nagpadangat sa ila sang impormasyon sang Enero 3 nga may yara sang nasapwan nga bata nga nakabitay sa puno sang kahoy sa Purok Kabulakan, Barangay Rizal, Sagay City.
Gilayon nga ginpadulungan sang Sagay City Police ang lugar sa Barangay Rizal kag nakita nga may isa ka kalat kag may minor nga babayi nga nakabitay sa manubo nga puno sang kahoy nga gina-alegar nga nagsuicide.
Samtang, nagaimbestigar ang kapulisan, nagpalagyo ang stepfather sang biktima nga si Elias Gransiso.
Nagpatigayon ang Sagay City Police Station sang follow up investigation kag natukiban sang intel operatives nga nagapanago si Gransiso sa Purok Manara, Barangay Puey, Sagay City.
Gilayon man nagproceed ang police sang Sagay City Police Station sa lugar kag natigayon nga madakop ang suspetsado.
Gintuad sang suspetsado nga siya ang nagpatay sa biktima bangud nakagamit ini sang ginadumilian nga droga.
Gin-ako man ni Gransiso nga gintilawan man sini nga himuslan ang biktima apang wala nakapenetrate apang nakatigayon nga makapautwas.
Antes masapwan ang bangkay, naglisensya ang biktima nga ma-CR apang wala na nakabalik.
Ang iya bangkay ang nasapwan sang residente sa lugar.
Sa karun, ginahulat nalang sang Sagay City Police ang medico legal kag autopsy report agud mapreparar ang pagpasaka sang kaso batok kay Gransiso nga rape with homicide.
