Gina-imbitar ni Bacolod City Mayor Greg Gasataya ang publiko nga magtambong kag magkaon sa tatlo ka adlaw nga selebrasyon sang Bacolod Chicken Inasal Festival nga nagsugod na subong nga adlaw, Mayo 29 tubtob Mayo 31.
May ara sang tatlo ka festival site kalakip diri ang SM City Bacolod, Megaworld The Upper-east kag Ayalla Malls.
Nagsugod alas-11:00 kaina sang aga ang Grand Opening: The Taste of Chicken Inasal sa Manokan Country sa SM City Bacolod samtang alas-6:00 subong nga hapon patigayunon ang The BCIF Awards 2026 nga magahatag sang pagkilala sa mga personalidad kag negosyo nga nagbulig sa promosyon san Chicken Inasal sa ciudad.
Samtang bwas, Mayo 30, mangin sentro naman sang selebrasyon sa The Upper East, Megaworld para sa “The Grand Chicken Inasal Parade” nga magasugod alas-4:00 sang hapon.
Lakip diri amg float parade, street dance kag arena dance nga ginalauman nga pagatambungan sang madamo nga Bacolodnon kag turista.
Masundan ini sa alas-6:00 sang gab-i sang “The BCIF Rotisserie Show,” nga magapakita sang nagkalain-lain nga pamaagi sa pagluto sang inasal kag iban pa nga putahe sang manok.
Sa katapusan nga adlaw sang sa Mayo 31, mangin venue naman ang Ayala Malls Capitol Central sang “The BCIF Chicken Inasal Cook-off” alas-10:00 sang aga, nga pagasakopan sang mga talented cooks kag chefs gikan sa nagkalain-lain nga bahin sang rehiyon.
Samtang alas-6:00 sang gab-i, pagahiwaton ang “SMB Beer Pairing & Food Tasting 2026”. Samtang, Nakahanda na ang Bacolod City Police Office para sa seguridad sang tatlo ka adlaw nga Bacolod Chicken Inasal Festival nga nagsugod na subong nga adlaw, Mayo 29 tubtob Mayo 31.
Sa interview sang Bombo Radyo kay Bacolod City Police Office Deputy City Director for Operations PLt Col. Lester Leada, ginpahayag sini nga nakaplastar na ang deployment sang kapulisan para sa tatlo ka identified festival venues sa ciudad.
Suno kay Leada, may yara na sang police deployment sa kada festival site agud masiguro ang seguridad sang publiko.
Ang tatlo ka festival site amo ang Manokan Country sa SM City Bacolod, Ayala Malls Capitol Central kag The Upper East.
Dugang pa niya, nagahulat na lamang sila sang approval gikan sa Negros Island Region Police para sa duha ka platoon nga ila gin-request bilang augmentation force.
Dugang pa, may 250 ka mga personnels man sang BCPO ang igadeploy, wala pa nalakip diri ang mga police patrollers nga regular nga nagalibot sa ciudad.
Pahanumdom sini sa publiko nga mahimo magkontak sa emergency hotline nga 911 kun inkaso may emerhensiya. Suno sa iya, direkta nga iga-refer sang operator ang concern sa pinakamalapit nga police station agud gilayon nga marespondehan.
