Patay ang menor de edad nga lalaki matapos gintiro sa Purok Kawayanan I, Phase 6-B, Barangay Handumanan, Bacolod City, Miyerkules sang gab-i.
Sa interview sang Bombo Radyo kay Police Captain Armilyn Vargas, station commander sang Police Station 10, igo sa nalikod nga bahin sang ulo ang gin-agom sang biktima nga si John Martin Ronamo sang amo man nga lugar nga gintunaan sang iya kamatayon.
Nagatindog ang 16-anyos nga biktima sa gwa sang tiange sang nagpalapit ang tatlo ka mga suspetsado kag sila ang naglalisay antes ini gintiro sa ulo.
Gindala si Ronamo sa Corazon Locsin Montelibano Memorial Regional Hospital apang Huwebes sang kaagahon, ini ang ginbawian sang kabuhi.
Sa bulig sang mga residente nga nakasaksi sa krimen, nadakpan sang mga pulis ang duha sa tatlo ka mga suspetsado.
Ini ang ginalakipan sang isa ka menor de edad kag ligal ang pang-edaron apang indi pa mabuyagyag ni Vargas ang pangalan sini bangud padayon pa ang hot pursuit operation batok sa isa.
Wala narekober sang Police Station 10 ang armas nga gingamit sang mga suspetsado apang ginapahayag nga ini ang home-made.
Suno kay Vargas, daan nga hiligut-anon ang motibo sa krimen bangud nakastiguhan sadto sang biktima ang isa sa mga suspetsado.
Desidido naman ang pamilya Ronamo nga magpasaka sang kaso batok sa mga suspetsado.
