Masobra P800,000 nga balor sang iligal nga droga ang nakumpiskar sa gin-patigayon nga buybust operation sang City Drug Enforcement Unit (CDEU) sang Bacolod City Police Office sa syudad sang Bacolod kahapon sang hapon.
Sa impormasyon nga nakuha sang Bombo Radyo, pasado alas 5 kahapon sang hapon sang nag-operate ang mga kapulisan sa Purok Tahong Barangay 2 sa diin nadakpan ang suspetsado nga ginkilala kay Beverly Maraviles, 18 anyos, nagabusong kag residente sang nasambit nga lugar.
Sa inteview sa team leader sang CDEU nga si Police Lieutenant Colonel Leonardo Borromeo, si Maraviles ang ginakabig nga high value target (HVT) sang mga kapulisan bangud dako nga balor sang iligal nga droga ang nakumpiskar sa iya kag nakaagi naman ini nga gin-buybust upod ang iya bana apang nakapalagyo.
Sa pag-patigayon naman sang operasyon sa Purok Tahong kahapon, nag-tinguha pa si Maraviles nga makapalagyo sang iya nahibaluan nga isa ka pulis ang iya naka-transaksyon sa diin nagdalagan ini pasulod sa ila puluy-an kag nagtaklas sa bintana sang ila kusina kag naglumpat paggwa apang nati-onan naman nga yara didto nakabantay si Borromeo sa sagwa kag didto na nadakpan ang suspetsado.
Narekober sa paghinakop ni Maraviles ang 1 ka elongated sachet sang suspected shabu bilang buybust item, 4 pa ka mga elongated sachets kag 12 ka bulto sang suspected shabu nga nagabalor sang P852,000, dugang pa sa nakuha sa iya ang isa ka digital weighing scale, isa ka wallet, kag mga transparent plastic nga gina-usar sa re-packing sang shabu.
Yara karun nakahunong sa kustodiya sang Police Station 2 ang suspetsado kag nakatalana nga pasakaan sang kaso nga paglapas sa Republic Act 9165 ukom Comprehensive Dangerous Drugs Act of 2002.
