BACOLOD CITY — Magabiya na subong nga adlaw padulong sa pungsod Singapore ang duha ka teams sang Negros Occidental nga tiglawas sang Pilipinas sa Asia Pacific Little League Softball Championship.
Sa interview sang Bombo Radyo Bacolod kay Coach Roselle Hulleza, 101% nga preparado ang mga kabataan sa palaabuton nga hampang.
Alas-2:00 sa hapon, magapadulong sila sa ciudad sang Iloilo agud didto magsakay pakadto sa Singapore takna alas-10:00 sa gab-i.
Una nga makasambuwa sang team ang pungsod Australia nga first time mag-intra sa Hunyo 29 sang aga.
Dugang pa ni Hulleza nga dako gid ang nabulig sang probinsiya sang Negros Occidental sa pagsustiner sang ila mga kinahanglanon pati na ang ciudad sang Bacolod kag iban pa nga mga Local Government Units (LGU).
13 ka mga humalampang kag tatlo ka mga coaches ang magatulak padulong sa Singapore agud depensahan ang titulo sa Junior League category.
Sang nagligad nga tuig, kampeon ang Negros Occidental sa major kag senior league category.
Bilang defending champion, kinahanglan gid nila nga depensahan ang ila titulo.
Ang Asia Pacific Little League Softball Championship ang pagahiwaton halin Hunyo 29 tubtub Hulyo 1 sa United World College of South East Asia – Dover Campus sa Dover, Singapore.
