Duha ang patay sa nagluntad nga shooting incident sa Sitio Stop Aguinaldo, Barangay San Isidro, Toboso, Negros Occidental kaina sang aga.
Ginkilala ang mga biktima nga sanday Elias Palay kag Alyas Putot Alonsado.
Santo sa police report, may nagtawag sa ila nga concern citizen nga may nagluntad nga shooting incident kun sa diin gilayon man nga ginrespondehan sang mga kapulisan.
Santo sa imbestigasyon mga alas 8:20 ang takna kaina sang aga samtang nagapungko sa iya ginabaligyaan sang uga si Elias Palay sang ini ang ginpalapitan sang isa ka lalaki nga nakabonnet kag wala sang madamo nga estorya gintiro ini sang makapila ka beses gamit ang wala pa matuod nga calibre sang armas-luthang.
Ang biktima ang nakaagom sang igo sang bala sa nagkalain-lain nga bahin sang lawas sini.
Matapos ang insidente gintuyo sang suspek nga magpalagyo apang nakita ini ni Alyas Putot kag gintuyo pa nga tiruhon sang dala sini nga pistola apang naunahan ini sang suspek sa pagtiro sang makapila ka beses kun sa diin nakaagom sang samad sa pila ka bahin sang lawas sini.
Ang duha ang gindeklarar nga wala na sang kabuhi sang nagresponde nga responder sang Municipal Disaster Risk Reduction Management Office sang Toboso.
Sa karun padayon ang imbestigasyon sang kapulisan sa insidente kag padayon man ang hot pursuit agud malagas ang suspek.
