Wala ginlauman sang isa ka Bacoleño composer nga si Edgardo Miraflor sang Barangay Tangub, Bacolod City nga nakasulod man ang isa pa gid sini ka komposisyon sa semifinals sang 3rd Bombo Music Festival.
Nangin inspirasyon ni Miraflor sa komposisyon sini nga “Mamam” amo ang mga tawo nga nagaka-inlove lamang kun hubog ang mga ini.
“Mamam” ang nangin tigulo sang iya ikaduha nga komposisyon bangud ini ang slang term para sa inom.
Suno kay Miraflor, ang kanta nga “Mamam” ang samo sang lengwahe nga Filipino kag English kag isa ini ka soft rock.
Suno diri, gin-compose niya ang nasambit nga kanta sang nagatrabaho ini sa cruiseship bangud masami sila ginapa-amba sa bar.
Kun madumduman nga una na nga nakasulod sa top 115 semifinalist ang iya komposisyon nga “Someday When I Am A King” nga nagaistorya sang panan-awan sang isa ka pigado nga tawo sa iya kabuhi nga bisan simple lang ang pangabuhi, isa ini ka hari kag mangin rayna naman ang iya misis kag mangin prinsesa ang mga kabataan.
Bangud mahilig magsulat sang kanta, nagpanugyan ang Bacoleño composer sa mga tagpalamati ilabi na sa mga may huyog man nga magcompose nga padayunon lang ang passion.
Sa kabug-usan, indi na magnubo sa 80 ka mga kanta ang nacompose ni Miraflor.
