Dakop ang isa ka babayi nga ginakabig High Value Individual matapos nga makuhaan sang 80 grams nga suspected shabu sa ginpatigayon nga drug buybust operation sa Purok Langis, Barangay Banago, Bacolod City.
Ginkilala ang subject person kay Kristel Romero, 21 anyos, single wala sang trabaho kag residente sang Purok Langis, Barangay Banago, Bacolod City.
Narecover sa iya ang kapin 80 grams sang suspected shabu kag nagabalor sang P544,000.
Sa interview sang Bombo Radyo Bacolod kay Police Lt Col. Antonio Benitez, pinuno sang Bacolod City Drug Enforcement Unit, ginatudlo sang iban nga mga una na nadakpan sa drug buybust operations nga ang subject person ang nagadagdag sang supply sang illegal nga druga.
Suno kay Benitez, ang impormasyon nga ila nabaton ang ila ginvalidate kag nakumpirmar man ini paagi sa pagtsekyar sa area.
Aminado man ini nga may yara sila sang kabudlayan sa pagmonitor sa subject person bangud man sa lugar sini.
Apang sa pihak sini, may yara sang mga pumuluyo nga nagahatag sang real time information kag natigayon nila nga mapatigayunan sang buybust operation kag madakpan si Romero.
Wala sang trabaho si Romero samtang ang bana sini ang napriso naman bangud nadakpan sa buybust.
Nakahunong na ini sa Bacolod Police Station 3 kag natalana nga pasakaan sang kaso nga paglapas sa section 5 kag 11 sang RA 9165 ukon Comprehensive Dangerous Drugs Act of 2002.
