BACOLOD CITY — Kumpiyansa si Governor Alfredo Marañon Jr. nga may maayo nga palaabuton ang pag-produkto sang marang sa probinsiya sang Negros Occidental.
Ini ang ginpahayag sang gobernador kadungan sang pagbukas sang ikaduha nga Marang Festival sa kapitolyo, Huwebes sang aga.
Suno kay Marañon, magluwas nga mahapos patubuon kag pabungahon, madamo naman sang iban nga produkto nga nahuman gikan sa marang kaangay sang marang ice cream, dulse, polboron kag iban pa.
Daku man ang demand sini sa Metro Manila kun sa diin mabaligya ini sa mas mataas nga presyo.
Nagapati ang amay sang probinsiya nga daku ang mabulig sa palangabuhian sang mga mangunguma ang pagprodukto sang marang.
Bangud sini, suno kay Gov. Marañon, ginatinguhaan sang provincial government nga mahatagan sang pasidungog ang prutas nga marang paagi sa pagsaulog sang kapiyestahan sini.
Nahibaluan nga diskumpyado si Marañon nga nagabakal pa sang prutas gikan sa iban nga pungsod ang Pilipinas samtang sarang man makapatubo sang mga ini ang lokal nga mga manguguma.
