BACOLOD CITY-Arestado ang tatlo ka mga security guards matapos nadakpan nga nagapatigayon sang checkpoint sa isa ka barangay sa banwa sang Isabela.
Suno sa hepe sang Isabela Municipal Police Station Police Captain Roger Pama, ginpadulungan nila upod ang Regional Civil Security Unit (RCSU) Region 6 ang checkpoint nga gintukod sang tatlo ka mga security guard nga sanday Gerenico Cabugnason, Joemarie Cabansagan kag Leodegario Santisteban sa national highway sang Brgy. Maytubig, Isabela mga alas-11:00 kahapon sang aga.
Ini matapos ang nabaton nga reklamo sang Isabela Municipal Police Station.
Sang gin-usisa ang mga guwardia, ginpahayag sang mga ini nga wala sang Deed of Donation ang duta nga ila ginahamtangan kag ginsugo lang sila sang lalaki nga nagahingalan kay Lorenzo Suatingco nga magbarikada sa lugar.
Nahibaluan nga humalin pa sang Mayo 8, 2019 nagsugod ang mga guwardiya gikan sa Black Arrow Security Agency sa pagtukod sang checkpoint sa nasambit nga lugar.
Nakuha sa mga guwardiya ang isa ka unit sang Cal.38 revolver kag duha ka units sang 12 GA shotguns nga lunsay mga wala sang lisensya.
Suno kay Pama, pasakaan sang kaso nga paglapas sa RA 10591 ukon “Comprehensive Firearms and Ammunition Regulation Act” kag Comelec gun ban ang mga arestado.
Upod man sang tatlo si Carlo Francis Geopano apang wala ini ginpriso bangud wala man ini nakuhaan sang armas.
