Patay ang 33 anyos nga lalaki matapos ginbuno sang iya 42 anyos nga magulang sa Purok Ipil Ipil, Brgy. Bulanoon, Sagay City, Negros Occidental, sang Miyerkules, alas- 6:55 sang gab-i.
Ang biktima ginkilala nga si alias Jovan, 33 anyos kag ang suspect nga magulang sini amo si alias Dodong, 42 anyos, lunsay mga manugpangisda kag residente sang nasambit nga lugar.
Sa imbestigasyon sang Sagay City Police Station, ang mag-utod naga-inom inom kaupod ang anum pa gid nila ka abyan apang nagbaisay ang duha angot sa esturyahanay sa duta.
Hinali na lang ginsumbag ni Jovan si Dodong apang nagdali-dali kuha si Dodong sang patalom sa iya balay kag ginbuno ang iya manghod.
Nagtinguha malagyo si Jovan apang ginlaot ini sang iya magulang kag ginbuno sang pila ka beses.
Nag-agom sang pilas sa nawala nga kamot kag natoo nga ilok si Jovan nga ginhingagaw dala sa ospital apang ginbawian sang kabuhi.
Samtang, nadakpan si Dodong sa sulod sang iya balay kag boluntaryo sini nga ginsurrender ang patalom nga gingamit niya patay sa iya manghod.
