Patay ang isa ka 38-anyos nga driver sang truck sang tubo matapos ginluthang sang wala pa makilal-an nga persona sa Purok Gargnira 1, Barangay Tadlong, Sagay City, Mayo 30 sang aga.
Suno kay Police Lt. Col. Jonel Guadalupe, hepe sang Sagay City Police Station, nakapark ang 10-wheeler truck nga ginasakyan sang biktima nga si Ernie Esaki alyas Nonot, 38-anyos, residente sang Purok Pico sa nasambit nga barangay sang siya ang ginhagad sang wala makilal-an nga suspetsado nga magpanaog kag magpamahaw.
Sang nanaog si Esaki kag lapit na lamang sa suspetsado, hinali lamang ini nga ginluthang sang makapila ka beses sa nagkalain-lain nga bahin sang lawas.
Nagpalagyo naman sa wala mahibaluan nga direksyon ang suspetsado.
Ginhingagaw pa dala sa ospital ang biktima apang gindeklarar na ini nga dead on arrival.
Narecover sa crime scene ang duha ka empty shells sang .45 calibre pistol.
Sa karun nagapadayon pa ang imbestigasyon kag hot pursuit operation sang mga otoridad.
