Gindumili anay sa karun ang pagkuha sang tubig sa duha ka mga bubon sa Metro Bacolod District Jail (MBDJ) samtang ginausisa ang pagbatyag sang 60 ka mga persons deprived of liberty (PDL) ukon priso sang diarrhea ukon loose bowel movement.
Ini ang kasunod sang pagka-alarma ni MBDJ warden Jail Chief Inspector Ruth Estales sa pagbatyag sang mga PDLs.
Suno kay Estales, indi man tingob sa isa lang ka adlaw ang pagbatyag sang 60 ka PDLs sang diarrhea kundi may yara sang pipila nga nagabatyag sa isa ka semana sa kabug-usan sang bulan sang Abril.
Ginasuspetsuhan sang MBDJ nga ang isa sa rason sang pagbatyag sang mga inmates amo ang ila tubig.
Nahibaluan nga duha ka deep wells ukon bubon kag suplay sang Bacolod City Water District (BACIWA) ang source sang tubig sa MBDJ.
Bangud sini, nagpatigayon na ang City Health Office sang water sampling kag ginhatagan sang nagakaigo nga pagbulong ang mga nagbatyag nga PDLs.
