Nagalaom ang lola sang pito ka tuig nga bata nga babayi nga ginpatay, ginsulod sa sako kag ginhaboy sa basurahan sa Villa Miranda, Barangay 6A, Victorias City nga madakpan gilayon ang suspetsado sa krimen.
Sa interview sang Bombo Radyo kay Nanay Alma Didal, wala ini sang liwan nga ginatudlo nga suspetsado sa pagpatay sa iya apo nga si Janelle Mae alyas Bebe kundi ang ila tupad-balay nga si Mark Besa nga nagsugo sa iya apo nga magbakal sang sigarilyo alas-2:00 kahapon sang hapon.
Suno sa lola, manghod ni Bebe ang nagpanugid nga ginsugo ini ni Besa nga magbakal sa tiange.
Yara man sa ila balay si Nanay Alma apang wala ini nakahibalo nga ginsugo ni Besa ang iya apo.
Bangud wala nakapauli si Bebe tubtub magkasisidmon, nagsugod na ang lola sa pagpangita sa iya apo, kaupod ang iban nila nga kasilingan.
Sa dalayon nga pagpangita, nakit-an sang mga residente ang duha ka sako nga nagasampaw sa basurahan sa tupad sang balay ni Besa.
Sa naidalom nga sako, nakit-an ang nagabarikutot nga lawas ni Bebe.
Sa exclusive interview kay John Evert nga nagbulig sa pagpangita kay Bebe, aminado ini nga madamo na sila sang ginkadtuan antes natumod nga yara sa basurahan ang bangkay sang Grade 2 pupil.
Ang isa ka kaupod ni John Evert ang nakapadulong sa talambakan sang basura kag nakit-an sini ang nagatangkas nga duha ka sako.
Sang ginbuksan sang mga ini ang naidalom nga sako, didto nakit-an ang nagakulo nga lawas ni Bebe kag wala na sang kabuhi ang bata.
Natalana pa nga ipaidalom sa autopsy examination ang bangkay sang biktima agud matumod kun ano ang gintunaan sang iya kamatayon.
Apang suno sa tiyo ni Bebe, may yara ini sang pilas sa dughan kag nagabura ang iya baba nga patimaan nga ini ang ginkuga.
