BACOLOD CITY – Pito ang kumpirmado nga patay, kalakip na ang anom ka mga pulis, samtang apat naman ang pilason sa nagluntad nga ambush sa Barangay Magsaysay, Guihulngan City, Negros Oriental, Biyernes sang aga.
Sa pag-usisa sang Bombo Radyo sa lugar, nakumpirma nga kalakip ang hepe sang Guihulngan City Police Station nga si Police Supt. Arnel Arpon sa mga napatay.
Magluwas sa iya, patay man ang mga kaupdanan sini nga sanday SPO2 Necasio Tabilon; SPO2 Teovic Agosto; SPO1 Jesael Ancheta; PO2 Alvin Paul Bulandres; PO2 Alfredo Dunque; kag ang driver sang motorsiklo nga si Michael Hambalos.
Samtang, pilason naman sanday SPO4 Jerome Delara; PO3 Jordan Baldera; PO2 Joery Maribao; kag Guihulngan City Councilor Paulo Edison Dela Rita.
Tadtad sang bala ang patrol car sang pulis amo gani nga madamo ang napatay.
Pil-as ang ambush site kag nakapwesto sa mas mataas nga lugar ang mga suspetsado amo gani nga nakabentaha ang mga ini sa tropa sang gobyerno.
Suno kay Col. Eliezer Losañes, commander sang 303rd Infantry Brigade sang Philippine Army, una nga gin-ambush si Councilor Dela Rita kun sa diin napatay ang iya nga driver.
Nagresponde ang mga pulis sa pagpamuno ni Arpon apang sila naman ang gin-ambush kag nagresulta sa madamo nga casualties.
Suno kay Losañes, si Dela Rita ang yara sa listahan sang mga target nga atakehon sang NPA kag naggwa sa ila nga intelligence monitoring.
Indi pa makumpirmar sang militar kun NPA gid man ang mga suspetsado apang suno kay Major General Jon Aying, commander sang 3rd Infantry Spearhead Division sang Philippine Army, kuta sang Central Negros Front sang NPA ang Guihulngan City kag kaiping nga mga ciudad kag banwa sa isla.
