Ang mga Lolo kag Lola natun ang mga self-less kag ang ila pagpalangga sa ila apo ang indi matupungan.
Isa na diri ang 72-anyos nga lolo sa China nga ginadayaw sang mga Chinese netizens bangud sa determinasyon sini nga ipabulong ang iya apo nga may malala nga balatian.
Sang 2017, ang lima ka tuig nga apo ni Zhu Yunchang ang na-diagnose nga may spinal muscular atrophy.
Bangud sini, kinahanglan nga ibaligya sang ila pamilya ang pila sang ila mga propiedad agud makapabulong.
Ang pension kada bulan nga nabaton ni Zhu ang kulang man, gani nagpangita siya sang iban nga makuhaan sang income.
Natukiban niya nga ang mangin isa ka beauty kag make-up vlogger ang may dako nga income gani nakadesisyon ini nga testingan.
Agud nga makagamit sang make-up sa umpisa sang vlog, nagpangayo ini sang samples sa isa ka cosmetics company apang sang nahibaluan nila nga 72 anyos ini nga lolo, nagpamalibad sila nga padal-an siya sang libre nga produkto.
Si Zhu nagpangisog nga magkadto sa isa ka baligyaan sang make-up agud magbakal sini para gamiton sa iya vlog.
Didto man siya gintudluan ang saleslady kun paano ini gamiton sang husto.
Sa una nga livestream ni Zhu, gilayon siya nga natalupangdan sang mga nagalantaw bangud sang iya pinasahi nga content.
Sang nahibaluan sang mga viewers ang rason ni Zhu sa pagsuksok sang makeup, madamo sang balatyagon ang natandog bangud ginahimo sang Lolo ang bisan ano puede himuon agud lang mabuligan ang iya apo.
Bangud sini, madasig nga nagsaka ang views sang iya mga videos kag nag-monetize.
Sa karon, nabakal na ni Zhu ang bulong kag may yara naman sang inugbayad sa medical check-up sang iya nga apo kag bisan nga nasabat na ang problema sini, nagapadayon siya sagihapon ang iya vlogging.
