BACOLOD CITY – Wala sa drugs watchlist ang isa ka Muslim nga nakuhaan sang balor 1.6 milyones pesos nga shabu sa ginpatigayon nga buy bust operation sa Barangay Palampas, ciudad sang San Carlos tinalikdan nga Lunes, Hunyo 12.
Ini ang ginpahayag ni Police Supt. Arturo Fullero, ang hepe sang San Carlos City Police Station, sa interview sang Bombo Radyo Bacolod.
Suno kay Fullero, bag-ong tukib nga drug personality ang naarestar nga ginkilala kay Corsiden Pangkatan Abie alias Jamil, 43-anyos, tumandok sang Lanao del Sur apang duha katuig na nga nagapuyo sa V. Gustilo St., Barangay 5, sa nasambit nga ciudad.
Ginpahayag nga nakabaton sang impormasyon ang kapulisan nga may isa ka Muslim nga imbolbado sa pagbaligya sang ilegal nga druga rason nga naglunsyar gilayon ang Station Drug Enforcement Unit (SDEU) sang buy bust operation.
Positibo nga nabaklan si Abie sang balor 1,200 pesos nga shabu samtang sakay sang iya traysikel kag sang ginrekisa, nakuhaan pa ini sang duha ka dalagku nga plastic sachet nga ginabulubanta nagabug-at sang 16- grams nga shabu.
Ang nasambit nga kadamuon sang druga ang ginabanta nagabalor sang 1.6 milyones pesos.
Suno kay Supt. Fullero, ginapatihan magapadulong sa banwa sang Toboso si Abie agud ibaligya ang druga bangud kapyestahan sang banwa sang amo nga adlaw.
